Euver de Kakers
De naam van de Carnavalsvereiniging van Maxet is afgeleidj van ’t toponiem Kerrekakert. We treffe deze benaming aan veur ein percieël op Maxet op de ieërste kadasterkaart van dit gebied oet 1844. De naam is waarsjienlijk aojer.
’t Ieërste deil van ’t woord wiesj op de eigenaar of gebroeker van ’t gebied. De grondj behuürdje dus deils of gehiël biej boorderie Kerrehof op Maxet.
Toponiem
’t Toponiem (plaatsnaam) Kakert is ’n weinig veurkommendje veldjnaam; zeker in ozze provincie. D’r waerdj ein afgedamdj percieël mèt bedoeldj, ’n gebied det omgaeve waerdj door (lieëge) diekskes. Die aafdamming heet natuurlijk te make mèt ’t gesjiktj make als landjbouwgrondj en daotoe mosje water oet ’t van vreugeroet naate gebied waere geweerdj.
’t Groeëte percieël det in 1844 de naam Kakert draagtj, kèn natuurlijk in de loup der tied groeëter zeen gewaore den ’t ieërste oorspronkelijk afgedamdje percieël.
Verantjwoording
De website (www.beljike.be › histoire › noms-de-famille-belges) gaeftj os de volgendje informatie biej ’t begrip Kakert: Variant van Cackaert of Caekaert [FD] plutôt que nom d’origine comme Kaekaert, formé de moy. néerl. caech ‘parcelle endiguée’. Mét dit létste Parcelle endiguée waerdj in good Hollandjs ein afgedamdj percieël bedoeldj.
’t Middelnederlands waordenbook lieertj os det ’t moderne waord kaag, kumtj van caech. Det beteikentj polder, ingediektj landj of bedieking. Ouch die oetlèg kumtj dus neer op ein aafgedamdj percieël en dae naam ligktj waarsjienlijk aan de basis van de familienaam Kaag.
Bron (en dank aan): Pieter Knippenberg van Heemkundevereiniging Heitse.
